PRAVASI NEWS DAILY

best places in dubai serving a flavorful feast:ദുബൈ: കഴിഞ്ഞ കുറച്ച് വർഷങ്ങളായി എല്ലാത്തരം ഭക്ഷണങ്ങളുടെയും വിഭവങ്ങളുടെയും കേന്ദ്രമാണ് ദുബൈ. ലോകത്തിലെ വിവിധ രാജ്യങ്ങളിൽ നിന്ന് എത്തിപ്പെടുന്ന എല്ലാവർക്കും ഇഷ്ടപ്പെടുന്ന ഒരു രുചിയെങ്കിലും ഈ മഹാന​ഗരം ഒളിപ്പിച്ചു വെക്കുന്നു. യുഎഇയിൽ താമസിക്കുന്ന 200-ലധികം രാജ്യങ്ങളിൽ നിന്നുള്ള താമസക്കാർക്ക് അനുയോജ്യമായ ഭക്ഷണവിഭവങ്ങൾ ദുബൈയിൽ ലഭ്യമാണ്. യഥാർത്ഥത്തിൽ കഴിഞ്ഞ കുറച്ചധികം വർഷമായി ദുബൈ ഭക്ഷണത്തിന്റെ ഒരു ആഗോള ഗ്രാമമാണ്.

ദുബൈ ഫുഡ് ഫെസ്റ്റിവലിൽ ആദ്യമായി അവതരിപ്പിച്ച നഗരത്തിലെ ഏറ്റവും ജനപ്രിയമായ 10 ദിർഹം ഡിഷ് കാമ്പെയ്‌ൻ ദുബൈ സമ്മർ സർപ്രൈസസിന്റെ ഭാഗമായി കഴിഞ്ഞ ആഴ്ചയാണ് ആരംഭിച്ചത്. 10 ദിർഹത്തിന്റെ ബജറ്റിൽ ദുബൈയിൽ ആസ്വദിക്കാവുന്ന വ്യത്യസ്ത രുചികൾ ഇവയാണ്.

1. ചിക്കനും ബേസിൽ ഡംപ്ലിംഗും – ഗോൾഡൻ ഡ്രാഗൺ (ചൈനീസ്)

ഊദ് മേത്തയിലെ ഗോൾഡൻ ഡ്രാഗൺ റസ്റ്റോറന്റിലാണ് ചിക്കനും ബേസിൽ ഡംപ്ലിം​ഗും ലഭ്യമാവുക. ആവിയിൽ വേവിച്ച ചിക്കനും ബേസിൽ ഡംപ്ലിംഗുകളുമാണ് ഇവിടെ ലഭിക്കുക. നേർത്ത റാപ്പറുകളിൽ പൊതിഞ്ഞ അഞ്ച് ജ്യൂസി ഡംപ്ലിംഗുകൾ ഒരു പ്ലേറ്റിൽ മുന്നിലെത്തുമ്പോൾ ആരുടെ വായിലും വെള്ളം നിറയുമെന്നതിൽ സംശയമില്ല. ചൈനയിൽ നിന്നുദ്ഭവിച്ച ഈ വിഭവം ഇന്ന് ലോകമെമ്പാടും പ്രിയങ്കരമാണ്. ഓരോ രാജ്യത്തും ഈ വിഭവത്തിന് അതിന്റേതായ പതിപ്പുകൾ ഉണ്ടെന്ന് മാത്രം.

2. പാവ് ഭാജി – ബോംബെ സ്ട്രീറ്റ് (ഇന്ത്യൻ)

കരാമയിലെ ബോംബെ സ്ട്രീറ്റിൽ ലഭിക്കുന്ന പാവ് ഭാജിയാണ് അടുത്ത വിഭവം. ഇന്ത്യൻ തെരുവ് ഭക്ഷണത്തിന്റെ രാജ്ഞിയെന്ന് പാവ് ഭാജി അറിയപ്പെടുന്നത്. ക്രിസ്പി പാവ് ബൺ, കട്ടിയുള്ള വെജിറ്റബിൾ ഗ്രേവി, ധാരാളം വെണ്ണ, അരിഞ്ഞ ഉള്ളി എന്നിവ ചേർത്താണ് ഇത് വിളമ്പുന്നത്. രുചിയുടെ കാര്യത്തിൽ മറ്റു വിഭവങ്ങളെ അപേക്ഷിച്ച് പാവ് ഭാജി ഒട്ടും പുറകിലല്ല.

3. സാംസ – കെലിങ്ക (ഉസ്ബെക്ക്)

ഇന്ത്യയിൽ സമോസയും അറബ് ലോകത്ത് സാംബൂസെക്കും എന്ന് വിളിക്കപ്പെടുന്ന ത്രികോണാകൃതിയിലുള്ള ഈ ലഘുഭക്ഷണത്തിന്റെ ഉസ്ബെക്ക് പതിപ്പാണ് സാംസ. അടരുകളുള്ള പേസ്ട്രിയും ചൂടുള്ള മാംസം നിറച്ചതും ഒരു കടിയാണിത്. 

4. വെജിറ്റബിൾ റാമെൻ ബൗൾ – യല്ല മോമോസ് (ജാപ്പനീസ്)

കറാമയിലെ യല്ല മോമോസിൽ നിന്ന് ലഭിക്കുന്ന ചൂടുള്ള വെജിറ്റബിൾ റാമെൻ ബൗളാണ് അടുത്തത്. ബ്രോക്കോളി, കാരറ്റ്, ബെൽ പെപ്പർ, പീസ് എന്നിവയുടെ കട്ടിയുള്ള കഷണങ്ങളും നേർത്ത നൂഡിൽസും ചേർന്ന ഈ സൂപ്പ് പോഷകസമൃദ്ധവും ആശ്വാസദായകവുമാണ്.

5. ഷിഷ് തവൂക്ക് സാൻഡ്‌വിച്ച് – വില്ല ബെയ്റൂട്ട് (അറബിക്)

ഷെയ്ഖ് സായിദ് റോഡിന് സമീപമുള്ള വില്ല ബെയ്റൂട്ടിൽ നിന്ന് ലഭിക്കു്നന ജ്യൂസി ഷിഷ് തവൂക്ക് സാൻഡ്‌വിച്ചാണ് അടുത്ത വിഭവം. വെളുത്തുള്ളി സോസ്, അച്ചാറുകൾ, ഫ്രൈകൾ എന്നിവയോടൊപ്പം, ഈ അറബിക് വിഭവം ഒരു മികച്ച അനുഭവമാണ്. ഈ വിഭവത്തിന്റെ ജനപ്രീതി കടയുടെ മുന്നിലെ നീണ്ട ക്യൂ തന്നെ പറയും.

6. നെം നെം – ബോ (വിയറ്റ്നാമീസ്)

വിയറ്റ്നാമീസ് വിഭവം പരീക്ഷിക്കാത്തവർക്ക് പരീക്ഷിക്കാൻ പറ്റിയ വിഭവമാണ് നെം നെം. ചെമ്മീൻ, അരിഞ്ഞ ഇറച്ചി, നൂഡിൽസ്, കൂൺ, ഔഷധസസ്യങ്ങൾ എന്നിവ നിറച്ച ഫ്രൈഡ് റൈസ് പേപ്പർ റോളാണിത്. സ്പ്രിംഗ് റോളിനോട് സാമ്യമുണ്ടെങ്കിലും ഇതിന്റെ രുചി തികച്ചും വ്യത്യസ്തവും ആകർഷകവുമാണ്.

10 ദിർഹത്തിന് വൈവിധ്യമാർന്ന രുചികൾ ആസ്വദിക്കാൻ ലഭിച്ച ഈ അവസരം നഷ്ടപ്പെടുത്തരുത്. ഓഗസ്റ്റ് 31 വരെ, ദുബൈയിലെ ഈ ഭക്ഷണശാലകൾ നിങ്ങളുടെ രുചിമുകുളങ്ങൾക്ക് ഒരു ഉത്സവം തന്നെ സമ്മാനിക്കും.