PRAVASI NEWS DAILY

Credit Card Tips UAE;യുഎഇ: യുഎഇയിൽ ക്രെഡിറ്റ് കാർഡുകൾ ഒരു സാമ്പത്തിക ഉപകരണമാണ്. ഇത് ശരിയായ രീതിയിൽ ഉപയോഗിച്ചാൽ സാമ്പത്തിക സ്ഥിതി മെച്ചപ്പെടുത്താനും, തെറ്റായി ഉപയോഗിച്ചാൽ കടക്കെണിയിൽ അകപ്പെടാനും സാധ്യതയുണ്ട്. ക്രെഡിറ്റ് കാർഡുകൾ ഉപയോഗിക്കുന്നതിലൂടെ നിരവധി ആനുകൂല്യങ്ങൾ ലഭിക്കുന്നു എന്നത് സത്യം തന്നെ. അതേസമയം, തിരിച്ചടവ് കൃത്യമായി നടത്താത്ത പക്ഷം നിയമനടപടികൾ വരെ ഉണ്ടാകാം. എങ്ങനെ ക്രെഡിറ്റ് കാർഡ് ഉപയോഗിക്കാമെന്നും അതിന്റെ ഗുണങ്ങളും ദോഷങ്ങളും എന്തൊക്കെയാണെന്നും നോക്കാം.യുഎഇയിലെ പല ക്രഡിറ്റ് കാർഡുകളും ക്യാഷ്ബാക്ക്, എയർ ടിക്കറ്റ് നിരക്ക് കുറവ്, റിവാർഡ് പോയിന്റുകൾ എന്നിവ നൽകുന്നു. കൂടാതെ യാത്രകൾക്ക് ഓഫർ, ഭക്ഷണം, മറ്റ് സാധനങ്ങൾ വാങ്ങുന്നതിന് കൂടുതൽ ഓഫർ നൽകുന്നു. മാത്രമല്ല, എയർപോർട്ട് ലോഞ്ച് സൗകര്യം, വാഹനം പാർക്ക് ചെയ്യാനുള്ള സൗകര്യം, യാത്രാ ഇൻഷുറൻസ്, മറ്റു പല ഓഫറുകളും പ്രീമിയം കാർഡുകൾ നൽകുന്നു.

ക്രെഡിറ്റ് കാർഡുകൾക്ക് ഡെബിറ്റ് കാർഡുകളേക്കാൾ സുരക്ഷ കൂടുതലാണ്. പല ബാങ്കുകളും അംഗീകാരമില്ലാത്ത ഇടപാടുകൾക്ക് സീറോ-ലയബിലിറ്റി പോളിസികൾ നൽകുന്നു. സാധനങ്ങൾ നഷ്ടപ്പെട്ടാൽ അല്ലെങ്കിൽ കേടുപാടുകൾ സംഭവിച്ചാൽ പരിരക്ഷ നൽകുന്നു. മെഡിക്കൽ എമർജൻസികൾ, അടിയന്തിര യാത്രകൾ, വീട് നന്നാക്കാനുള്ള ചിലവുകൾ എന്നിവയ്ക്ക് ക്രെഡിറ്റ് കാർഡ് ഉപയോഗിക്കുന്നവരും ഉണ്ട്. വലിയ പർച്ചേസുകൾക്ക് ചില ബാങ്കുകൾ 0% പലിശയിൽ തവണകളായി തിരിച്ചടയ്ക്കാൻ അനുവദിക്കുന്നു.

എവിടെയൊക്കെ പണം ചിലവഴിച്ചു, ഏതൊക്കെ വിഭാഗത്തിലാണ് കൂടുതൽ ചിലവഴിച്ചത് എന്നെല്ലാം കൃത്യമായി അറിയാൻ സാധിക്കുന്നു. അതുപോലെ ഓരോ മാസത്തെയും സ്റ്റേറ്റ്മെൻ്റുകളും ഡിജിറ്റൽ ആപ്പുകളും ഉപയോഗിച്ച് ചിലവഴിക്കുന്ന പണം ട്രാക്ക് ചെയ്യാനും ഒരു പരിധി നിശ്ചയിക്കാനും സാധിക്കുന്നു.

വിദേശത്ത് ഓൺലൈൻ ഷോപ്പിംഗ് ചെയ്യാനും കറൻസി പേയ്‌മെന്റുകൾ നടത്താനും ക്രെഡിറ്റ് കാർഡ് ഉപയോഗിക്കാം. ഉത്തരവാദിത്തമില്ലാത്ത ഉപയോഗം സാമ്പത്തികപരമായ വെല്ലുവിളികൾ ഉണ്ടാക്കാം. കുറഞ്ഞ തുക മാത്രം അടയ്ക്കുന്നത് കൂടുതൽ പലിശ നൽകാനും, ഇത് കടം വർഷങ്ങളോളം നിലനിർത്താനും കാരണമാകും. ക്രെഡിറ്റ് കാർഡ് ഉപയോഗിച്ച് വരുമാനത്തിന് മുകളിൽ ചിലവഴിക്കുന്നത് കടത്തിലേക്ക് നയിക്കുന്നു. കൃത്യസമയത്ത് പണം അടയ്ക്കാതിരുന്നാൽ Al Etihad Credit Bureau സ്കോറിനെ ബാധിക്കുകയും ഭാവിയിൽ വായ്പകൾ എടുക്കുന്നതിന് തടസ്സമുണ്ടാക്കുകയും ചെയ്യും.

കാർഡിന് അപേക്ഷിക്കുന്നതിന് മുൻപ്, യോഗ്യതയും കുറഞ്ഞ ശമ്പളവും പരിശോധിക്കണം. (സാധാരണയായി അടിസ്ഥാന കാർഡുകൾക്ക് 5,000–10,000ദിർഹം വരെ ശമ്പളം വേണം. പലിശ ഒഴിവാക്കാൻ എല്ലാ മാസവും മുഴുവൻ തുകയും അടയ്ക്കുക. പണം മുൻകൂറായി എടുക്കുന്നത് ഒഴിവാക്കുക. തെറ്റായ ഇടപാടുകൾ ശ്രദ്ധയിൽപ്പെട്ടാൽ ഉടൻ ബാങ്കുമായി ബന്ധപ്പെടുക. കടക്കെണിയിൽ അകപ്പെട്ടാൽ ബാങ്കുമായി ബന്ധപ്പെട്ട് തുക കുറയ്ക്കുന്നതിനോ താൽക്കാലിക ആശ്വാസം നൽകുന്നതിനോ ആവശ്യപ്പെടുക.