PRAVASI NEWS DAILY

ദോഹ: ഖത്തറിൽ വെള്ളിയാഴ്ച ജുമുഅ നമസ്കാര സമയത്ത് വാണിജ്യ, വ്യവസായ സ്ഥാപനങ്ങൾ നിർബന്ധമായും അടച്ചിടണമെന്ന നിയമം ഇന്ന് മുതൽ പ്രാബല്യത്തിൽ വന്നു. വാണിജ്യ വ്യവസായ മന്ത്രാലയം പുറത്തിറക്കിയ 2025-ലെ 80-ാം നമ്പർ മന്ത്രിതല തീരുമാനമാണ് കർശനമായി നടപ്പാക്കിത്തുടങ്ങിയത്.

കഴിഞ്ഞ ഞായറാഴ്ച ഔദ്യോഗിക ഗസറ്റിൽ പ്രസിദ്ധീകരിച്ച പുതിയ നിയമപ്രകാരം, വെള്ളിയാഴ്ച ദിവസങ്ങളിൽ ആദ്യത്തെ ബാങ്ക് വിളി മുതൽ ഒന്നര മണിക്കൂർ നേരത്തേക്ക് രാജ്യത്തെ എല്ലാ കടകളും മറ്റ് വാണിജ്യ സ്ഥാപനങ്ങളും പ്രവർത്തനം പൂർണ്ണമായും നിർത്തിവെക്കണം.

ഒഴിവാക്കപ്പെട്ട സ്ഥാപനങ്ങൾ

അതേസമയം, നിയമത്തിൽ ചില അവശ്യ സേവന മേഖലകളെ ഒഴിവാക്കിയിട്ടുണ്ട്. പ്രാർത്ഥനാ സമയത്ത് തുറന്നു പ്രവർത്തിക്കാൻ അനുമതിയുള്ള സ്ഥാപനങ്ങൾ ഇവയാണ്:

• ഫാർമസികൾ
• ഹോട്ടലുകൾ, താമസ സൗകര്യമൊരുക്കുന്ന കേന്ദ്രങ്ങൾ
• ആശുപത്രികൾ, ആരോഗ്യ കേന്ദ്രങ്ങൾ, സ്വകാര്യ ക്ലിനിക്കുകൾ
• പെട്രോൾ സ്റ്റേഷനുകൾ
• വിമാനത്താവളങ്ങൾ, തുറമുഖങ്ങൾ എന്നിവിടങ്ങളിലെ സ്ഥാപനങ്ങൾ
• ടെലികമ്മ്യൂണിക്കേഷൻ കമ്പനികൾ
• വൈദ്യുതി, ജല ഉത്പാദന സേവനങ്ങൾ
• ബേക്കറികൾ
• എയർലൈൻ ഓഫീസുകൾ
• ഷിഫ്റ്റ് അടിസ്ഥാനത്തിൽ തുടർച്ചയായി പ്രവർത്തിക്കുന്ന വ്യവസായങ്ങൾ
• ചരക്ക്-യാത്രാ ഗതാഗത സേവനങ്ങൾ
• ബന്ധപ്പെട്ട അതോറിറ്റി പ്രത്യേക അനുമതി നൽകിയിട്ടുള്ള മറ്റ് സ്ഥാപനങ്ങൾ

നിയമലംഘനത്തിനുള്ള ശിക്ഷകൾ

പുതിയ നിയമം ലംഘിക്കുന്നവർക്ക് കനത്ത പിഴയും മറ്റ് നിയമനടപടികളും നേരിടേണ്ടിവരുമെന്ന് അധികൃതർ മുന്നറിയിപ്പ് നൽകി. 2015-ലെ 5-ാം നമ്പർ നിയമത്തിന്റെ ഭാഗമായാണ് പുതിയ ഭേദഗതിയെന്ന് ഖത്തർ ടിവിയിലെ ‘ബിസിനസ് സെഷൻ’ എന്ന പരിപാടിയിൽ പങ്കെടുത്തുകൊണ്ട് അഭിഭാഷകൻ സൈഫ് അൽ മുറാദി വിശദീകരിച്ചു.

• ഉടനടി ചുമത്തുന്ന പിഴ: നിയമം ലംഘിച്ചാൽ ആദ്യഘട്ടത്തിൽ 10,000 ഖത്തർ റിയാൽ പിഴ ചുമത്തും.
• കോടതി നടപടികൾ: നിയമലംഘനം ആവർത്തിച്ചാൽ, സ്ഥാപനം ഒരു വർഷം വരെ അടച്ചുപൂട്ടാനോ ലൈസൻസ് റദ്ദാക്കാനോ കോടതിക്ക് അധികാരമുണ്ട്. നിയമത്തിലെ 26-ാം വകുപ്പ് പ്രകാരം ഒരു വർഷം വരെ തടവും 50,000 റിയാൽ വരെ പിഴയും ലഭിച്ചേക്കാം.
• വിധി പ്രസിദ്ധീകരിക്കും: പിഴയ്ക്കും മറ്റ് ശിക്ഷകൾക്കും പുറമെ, നിയമലംഘനം നടത്തിയ സ്ഥാപനത്തിന്റെ ഉടമയുടെ ചെലവിൽ രാജ്യത്തെ രണ്ട് പ്രമുഖ ദിനപത്രങ്ങളിൽ കോടതി വിധി പ്രസിദ്ധീകരിക്കാനും നിയമം അനുശാസിക്കുന്നു.

വെള്ളിയാഴ്ച പ്രാർത്ഥനയുടെ പവിത്രത നിലനിർത്തുക, വാണിജ്യ സ്ഥാപനങ്ങളുടെ പ്രവർത്തന സമയം നിയന്ത്രിക്കുക, രാജ്യത്തെ നിയമങ്ങൾ പാലിക്കുന്നുണ്ടെന്ന് ഉറപ്പാക്കുക എന്നിവയാണ് ഈ തീരുമാനത്തിലൂടെ ലക്ഷ്യമിടുന്നതെന്ന് അധികൃതർ അറിയിച്ചു.