Rare Strawberry Moon to Illuminate UAE: യുഎഇയില്‍ ഇന്ന് അത്യപൂര്‍വ സ്‌ട്രോബെറി മൂണ്‍ കാണാം; അപൂര്‍വ പ്രതിഭാസം ദൃശ്യമാവുക ഈ സമയത്ത്
Rare Strawberry Moon to Illuminate UAE:അബൂദബി: യുഎഇയില്‍ നാളെ അപൂര്‍വമായി മാത്രം സംഭവിക്കാറുള്ള സ്‌ട്രോബെറി മൂണ്‍ കാണാം. രാജ്യത്ത് സ്‌ട്രോബെറി മൂണ്‍ കാണാമെന്ന് വാര്‍ത്തകളിലും മറ്റും അറിഞ്ഞതോടെ ഇതേക്കുറിച്ച് ഗൂഗിളില്‍ തിരയുന്നവരുടെ എണ്ണം കുത്തനെ കൂടിയതായാണ് ഗൂഗിള്‍ ട്രെന്‍ഡില്‍ നിന്നും മനസ്സിലാകുന്നത്.
‘യുഎഇയില്‍ സ്‌ട്രോബെറി ചന്ദ്രന്‍ ദൃശ്യമാകും, ജൂണ്‍ 11 ന് വൈകുന്നേരം ഏകദേശം 7.32ന് ഉദിക്കുന്ന ചന്ദ്രന്‍ ജൂണ്‍ 12ന് പുലര്‍ച്ചെ 5.55ന് അസ്തമിക്കും,’ ദുബൈ അസ്‌ട്രോണമി ഗ്രൂപ്പിലെ (ഡിഎജി) ഓപ്പറേഷന്‍സ് മാനേജര്‍ ഖദീജ ഹസന്‍ അഹമ്മദ് പറഞ്ഞു. യുഎഇയിലുടനീളം സ്‌ട്രോബെറി ചന്ദ്രന്‍ ദൃശ്യമാകുമെന്നും ഇവര്‍ സ്ഥിരീകരിച്ചു.
‘ഇതുസംബന്ധിച്ച ഏറ്റവും നല്ല കാര്യമെന്തെന്നാല്‍ ഇത് കാണാന്‍ നിങ്ങള്‍ക്ക് പ്രത്യേക ഉപകരണങ്ങളൊന്നും ആവശ്യമില്ല എന്നതാണ്.’ ഖദീജ പറഞ്ഞു.
ചന്ദ്രോദയത്തിന് തൊട്ടുപിന്നാലെ, അതായത് വൈകുന്നേരം 7.32ന്, താമസക്കാര്‍ക്ക് പുറത്തേക്കിറങ്ങി കിഴക്കന്‍ ചക്രവാളത്തിലേക്ക് നോക്കാം. സ്‌ട്രോബെറി മൂണ്‍ തെളിഞ്ഞ ആകാശത്തിന് കീഴില്‍ നഗ്‌നനേത്രങ്ങളാല്‍ നിങ്ങള്‍ക്ക് കാണാനാകും. ബീച്ചുകള്‍, മരുഭൂമികള്‍ അല്ലെങ്കില്‍ ഉയര്‍ന്ന സ്ഥലങ്ങള്‍ പോലുള്ള തുറസ്സായ പ്രദേശങ്ങളില്‍ നിന്ന് ഇത് ഏറ്റവും നന്നായി കാണാനാകും. കിഴക്കന്‍ ചക്രവാളത്തിന്റെ വ്യക്തമായ കാഴ്ച ഉണ്ടെങ്കില്‍ നഗരത്തില്‍ നിന്നാണെങ്കിലും അത് കാണാന്‍ കഴിയുമെന്ന് ഖദീജ വിശദീകരിച്ചു.
‘ബൈനോക്കുലറുകളോ ദൂരദര്‍ശിനികളോ ഉപയോഗിക്കുന്നത് തീര്‍ച്ചയായും കാഴ്ച വര്‍ധിപ്പിക്കും.’ ഖദീജ പറഞ്ഞു.
‘പ്രപഞ്ചവുമായി നമ്മെ ബന്ധിപ്പിക്കുന്ന മനോഹരവും എളുപ്പത്തില്‍ കാണാന്‍ കഴിയുന്നതുമായ ഒരു അപൂര്‍വ സംഭവമാണിതെന്ന് അവര്‍ ചൂണ്ടിക്കാട്ടി. കാരണം സ്‌ട്രോബെറി മൂണ്‍ വസന്തകാലത്തെ അവസാനത്തെ പൂര്‍ണ്ണചന്ദ്രനും കാഴ്ചയില്‍ ഏറ്റവും ശ്രദ്ധേയമായ ഒന്നാണ്. ഈ സമയത്ത് ചന്ദ്രന്‍ ഉദിക്കുമ്പോള്‍ പലപ്പോഴും വലുതും കൂടുതല്‍ സ്വര്‍ണ്ണനിറത്തില്‍ ദൃശ്യമാകും.’
എന്നിരുന്നാലും, സ്‌ട്രോബെറി മൂണ്‍ എന്നാണ് ഇതിന്റെ പേരെങ്കിലും പിങ്ക് അല്ലെങ്കില്‍ ചുവപ്പ് നിറത്തില്‍ അല്ല ഇത് കാണപ്പെടുക. ചക്രവാളത്തില്‍ താഴ്ന്ന നിലയിലായിരിക്കുമ്പോള്‍ അന്തരീക്ഷ സാഹചര്യം കാരണം ഇത് സാധാരണയായി മഞ്ഞയോ ഓറഞ്ചോ നിറത്തില്‍ ആയിരിക്കും കാണപ്പെടുക.
ജൂണ്‍ 11ന് രാത്രി ആകാശത്ത് ദൃശ്യമാകുന്ന ഫുള്‍ സ്‌ട്രോബെറി മൂണ്‍ 18.6 വര്‍ഷത്തിലൊരിക്കല്‍ സംഭവിക്കുന്ന പ്രതിഭാസമാണ്.
അതിനാല്‍, വടക്കന്‍ അര്‍ദ്ധഗോളത്തില്‍ 18.6 വര്‍ഷത്തിനിടയിലെ ഏറ്റവും താഴ്ന്ന പൂര്‍ണ്ണചന്ദ്രനായിരിക്കും ഇത്, അതിന്റെ ഏറ്റവും തീവ്രമായ തെക്ക്കിഴക്ക്, തെക്ക്പടിഞ്ഞാറന്‍ പോയിന്റുകളില്‍ ഉദിക്കുകയും അസ്തമിക്കുകയും ചെയ്യും. അതേസമയം, തെക്കന്‍ അര്‍ദ്ധഗോളത്തില്‍, നേരെ വിപരീതമാണ്. ഈ മാസം ഏറ്റവും ഉയര്‍ന്ന പൂര്‍ണ്ണചന്ദ്രനെയാകും അവിടെ കാണുക.
Comments (0)