വിദ്യാഭ്യാസ മന്ത്രാലയം സ്കൂൾ പുസ്തകങ്ങൾക്കും യാത്രാ ഫീസിനും ഇളവ് നൽകുന്ന 5 വിഭാഗങ്ങൾ പ്രഖ്യാപിച്ചു
2025-2026 അധ്യയന വർഷത്തേക്കുള്ള സ്കൂൾ പാഠപുസ്തകങ്ങളുടെയും ഗതാഗത ഫീസിൻ്റെയും നിരക്ക് ഖത്തറിലെ വിദ്യാഭ്യാസ, ഉന്നത വിദ്യാഭ്യാസ മന്ത്രാലയം പ്രഖ്യാപിച്ചു. പുതിയ സർക്കുലർ അനുസരിച്ച്, പാഠപുസ്തകങ്ങൾക്ക് ഒരു സെമസ്റ്ററിന് ഒരു വിദ്യാർത്ഥിക്ക് 150 റിയാലും സ്കൂൾ ബസ് ഉപയോഗിക്കുന്നവർക്ക് ഗതാഗതത്തിനായി 220 റിയാലും ആയിരിക്കും. ആദ്യ 15 ദിവസത്തിനുള്ളിൽ മആരിഫ് (Maaref) പോർട്ടൽ വഴി ഇലക്ട്രോണിക് പേയ്‌മെൻ്റ് നടത്തണം. പണമായി സ്വീകരിക്കുന്നതല്ല.
പുസ്തകങ്ങൾക്കും യാത്രാ ഫീസിനും ഇളവുള്ള അഞ്ച് വിഭാഗങ്ങൾ താഴെക്കൊടുക്കുന്നു:
- ഖത്തരി വിദ്യാർത്ഥികൾ
- ഖത്തരി വനിതകളുടെ അമുസ്‌ലിം പൗരന്മാരുമായുള്ള വിവാഹത്തിലെ കുട്ടികൾ
- ഗൾഫ് സഹകരണ കൗൺസിൽ (GCC) രാജ്യങ്ങളിലെ പൗരന്മാരുടെ കുട്ടികൾ
- ഭിന്നശേഷിക്കാരായ വിദ്യാർത്ഥികൾ
- ഔഖാഫ് മന്ത്രാലയത്തിന് കീഴിലുള്ള പള്ളികളിലെ ഇമാമുമാരുടെയും മുഅദ്ദിൻമാരുടെയും കുട്ടികൾ
ഓരോ അധ്യയന വർഷത്തിൻ്റെയും തുടക്കത്തിൽ സ്‌കൂളുകൾക്ക് നൽകുന്ന ഔദ്യോഗിക ലിസ്റ്റുകളുടെ അടിസ്ഥാനത്തിലാണ് ഈ ഇളവുകൾ നൽകുന്നത്.
മന്ത്രാലയത്തിൽ നിന്നുള്ള പ്രധാന നിർദ്ദേശങ്ങൾ
- ഇളവ് ലഭിച്ച വിഭാഗങ്ങളിലെ വിദ്യാർത്ഥികൾക്ക് പുതിയതോ പഴയതോ ആയ പാഠപുസ്തകങ്ങൾ സൗജന്യമായി ലഭിക്കും.
- ഖത്തരി പൗരന്മാർ അല്ലാത്ത വിദ്യാർത്ഥികൾ പുസ്തകങ്ങൾ വാങ്ങുന്നതിന് മുൻപ് ഓൺലൈൻ വഴി പണം അടച്ച രസീത് ഹാജരാക്കണം.
- നഷ്ടപ്പെട്ടതോ കേടായതോ ആയ പുസ്തകങ്ങൾക്ക് വീണ്ടും പണം നൽകേണ്ടിവരും.
- അധികമുള്ള പുസ്തകങ്ങൾ നിശ്ചിത സമയപരിധിക്കുള്ളിൽ മന്ത്രാലയത്തിൽ തിരികെ നൽകണം: ഒന്നാം സെമസ്റ്ററിന് 2025 ഒക്ടോബർ 9-നും രണ്ടാം സെമസ്റ്ററിന് 2026 ഫെബ്രുവരി 5-നും മുമ്പ്.
- സ്‌കൂളുകൾക്ക് ഓരോ വിഷയത്തിൻ്റെയും അഞ്ച് കോപ്പികൾ മാത്രം റിസർവ് സ്റ്റോക്കായി സൂക്ഷിക്കാവുന്നതാണ്.
Comments (0)