Uae New law: യുഎഇയിൽ സ്കൂൾ തുറക്കുന്നതിന് മുമ്പ് രക്ഷിതാക്കൾ അറിയേണ്ടത്; ഇനി മുതൽ പുതിയ നിയമം
Uae New law;യുഎഇ: 2025-2026 അധ്യയന വർഷത്തേക്കുള്ള ഏകീകൃത സ്കൂൾ കലണ്ടർ യുഎഇയിലെ എല്ലാ പൊതു, സ്വകാര്യ സ്കൂളുകൾക്കും വേണ്ടി പുറത്തിറക്കി. അധ്യയന വർഷം 2025 ഓഗസ്റ്റ് 25 മുതൽ 2026 ജൂലൈ 3 വരെ ആയിരിക്കും. (ഷാർജയിലെ സ്വകാര്യ സ്കൂളുകൾക്ക് ജൂലൈ 2 വരെ) ആയിരിക്കും. വിദ്യാർത്ഥികളുടെ പഠന നിലവാരം മെച്ചപ്പെടുത്തുന്നതിനും, കുടുംബാംഗങ്ങളുമായി കൂടുതൽ സമയം ചെലവഴിക്കുന്നതിനും, സാമൂഹിക ജീവിതത്തിൽ പങ്കാളികളാകുന്നതിനും വേണ്ടി മൂന്ന് ഇടവേളകളും നാലാഴ്ചത്തെ ശൈത്യകാല അവധിയും കലണ്ടറിൽ ഉണ്ട്.പുതിയ അധ്യയന വർഷം ആരംഭിക്കാൻ ഏതാനും ആഴ്ചകൾ മാത്രം ബാക്കി നിൽക്കെ, യുഎഇ ഒരു സുപ്രധാന മാറ്റം എത്തി. ഇത് രാജ്യത്തുടനീളമുള്ള സ്കൂളുകൾ അവയുടെ അക്കാദമിക് ഷെഡ്യൂളുകൾ ആസൂത്രണം ചെയ്യുന്ന രീതിയെ മാറ്റും. വിദ്യാഭ്യാസ, മാനുഷിക വികസന, സാമൂഹിക വികസന കൗൺസിൽ അംഗീകരിച്ച ഈ നീക്കം, വിദ്യാർത്ഥികൾക്കും കുടുംബങ്ങൾക്കും സമൂഹത്തിനും മികച്ച പിന്തുണ നൽകുന്നതിന് രാജ്യത്തുടനീളമുള്ള അധ്യയന വർഷത്തെ ഏകോപിപ്പിക്കുന്നതിനുള്ള ഒരു പ്രധാന ചുവടുവയ്പാണ്.
പുതിയ അധ്യയന കലണ്ടറിൽ സ്കൂൾ വർഷത്തിൻ്റെ ആരംഭ, അവസാന തീയതികൾ, ടേം ബ്രേക്കുകൾ, എല്ലാ സ്കൂളുകൾക്കുമുള്ള അവധികൾ എന്നിവയ്ക്ക് ഏകീകൃത തീയതികൾ നൽകുന്നു. സ്കൂൾ ഷെഡ്യൂളുകൾ ഏകോപിപ്പിക്കുന്നതിലൂടെ, വിദ്യാർത്ഥികൾക്ക് പഠനത്തിൽ മികവ് പുലർത്താനും അവരുടെ കുടുംബങ്ങളുമായി നല്ല സമയം ചെലവഴിക്കാനും സാമൂഹിക ജീവിതത്തിൽ പങ്കെടുക്കാനും കഴിയുന്ന ഒരു അന്തരീക്ഷം സൃഷ്ടിക്കാൻ ലക്ഷ്യമിടുന്നു. സ്കൂൾ അവധികൾ സാമൂഹിക, സാംസ്കാരിക, ടൂറിസം പ്രവർത്തനങ്ങളുമായി യോജിപ്പിച്ചതിനാൽ പഠനത്തോടൊപ്പം സമൂഹവുമായുള്ള ബന്ധം കുട്ടികൾക്ക് ശക്തിപ്പെടുത്താൻ ഈ കലണ്ടർ സഹായിക്കുന്നു.
അധ്യയന വർഷം ഔദ്യോഗികമായി 2025 ഓഗസ്റ്റ് 25-ന് ആരംഭിക്കും. ഓരോ ടേമിന്റെയും ഇടയിൽ വിദ്യാർത്ഥികൾക്ക് വിശ്രമിക്കാനും ദേശീയ പരിപാടികളിൽ പങ്കെടുക്കാനും സമയം ലഭിക്കുന്ന രീതിയിൽ ചിട്ടയായ ഇടവേളകളോടെ മൂന്ന് ടേമുകളായി കലണ്ടർ തിരിച്ചിരിക്കുന്നു:
ഒന്നാം ടേം: 2025 ഓഗസ്റ്റ് 25 മുതൽ ഡിസംബർ 7 വരെയാണ് വരുന്നത്. ഡിസംബർ 8, 2025 മുതൽ 2026 ജനുവരി 4 വരെ നാലാഴ്ചത്തെ ശൈത്യകാല അവധി ആയിരിക്കും. സ്കൂളുകൾ 2026 ജനുവരി 5-ന് വീണ്ടും തുറക്കും.
രണ്ടാം ടേം: 2026 ജനുവരി 5 മുതൽ മാർച്ച് 15 വരെ. തുടർന്ന് മാർച്ച് 16 മുതൽ മാർച്ച് 29 വരെ സ്പ്രിംഗ് ബ്രേക്ക് ആയിരിക്കും. ഷാർജയിലെ സ്വകാര്യ സ്കൂളുകൾ മാർച്ച് 23-ന് തുറക്കും. ബാക്കിയുള്ള സ്കൂളുകൾ മാർച്ച് 30, 2026-ന് തുറന്നു പ്രവർത്തിക്കും.
മൂന്നാം ടേം: 2026 മാർച്ച് 30 മുതൽ 2026 ജൂലൈ 3 വരെ. ഷാർജയിൽ ഈ ടേം ജൂലൈ 2-ന് അവസാനിക്കും.
സ്കൂളുകൾക്ക് മിഡ് ടേം ബ്രേക്കുകൾ നൽകുന്നത് അക്കാദമിക് സമ്മർദ്ദം കുറയ്ക്കാൻ സഹായിക്കും.
ഒന്നാമത്തെ മിഡ് ടേം ബ്രേക്ക് വരുന്നത്, 2025 ഒക്ടോബർ 13 മുതൽ 19 വരെ.
രണ്ടാമത്തെ മിഡ് ടേം ബ്രേക്ക്: 2026 ഫെബ്രുവരി 11 മുതൽ 15 വരെ.
മൂന്നാമത്തെ മിഡ് ടേം ബ്രേക്ക്: 2026 മെയ് 25 മുതൽ 31 വരെ
സർക്കാർ പാഠ്യപദ്ധതി പിന്തുടരാത്ത സ്വകാര്യ സ്കൂളുകൾക്ക് ഒക്ടോബർ, ഫെബ്രുവരി മാസങ്ങളിൽ മിഡ് ടേം ബ്രേക്കുകൾ ഷെഡ്യൂൾ ചെയ്യാൻ അനുമതി നൽകിയിട്ടുണ്ട്. ഓരോ ബ്രേക്കും അഞ്ച് ദിവസത്തിൽ കൂടാൻ പാടില്ല. അധ്യയന വർഷത്തിൻ്റെ സുതാര്യത നിലനിർത്താൻ, എല്ലാ സ്കൂളുകളും അംഗീകരിച്ച കലണ്ടർ കർശനമായി പാലിക്കണമെന്ന് അധികൃതർ അറിയിച്ചു. ഓരോ ടേമിന്റെയും അവസാന ആഴ്ചയിൽ അന്തിമ വിലയിരുത്തലുകൾ നടത്തണം. മുൻകൂട്ടി നിശ്ചയിച്ച അന്താരാഷ്ട്ര പരീക്ഷകളിൽ പങ്കെടുക്കുന്നവർക്ക് ഇളവ് നൽകും.
Comments (0)