Eid Al Adha Holiday In Uae;ഈദ് അൽ അദ്ഹ അവധി; യുഎഇയിലെ തൊഴിലാളികൾക്ക് ആശ്വാസം, ജോലി ചെയ്താൽ നഷ്ടപരിഹാരം
Eid Al Adha Holiday In Uae;യുഎഇ: യുഎഇയിൽ ഇന്ന് അറഫാ ദിനവും കഴിഞ്ഞ് നാളെയോടെ ഈദ് അൽ അദ്ഹ അവധി ആരംഭിക്കും. ഇത്തവണ നാല് ദിവസമാണ് പൊതു അവധിയായി പ്രഖ്യാപിച്ചത്. എന്നാൽ ഈ അവധി ദിവസങ്ങളിൽ നിങ്ങളോട് ജോലി ചെയ്യാൻ കമ്പനി ആവശ്യപ്പെട്ടോ? എങ്കിൽ നഷ്ടപരിഹാരത്തിന്റെ കാര്യത്തിൽ യുഎഇ തൊഴിൽ നിയമം നിങ്ങളെ സഹായിക്കും.2021 ലെ ഫെഡറൽ ഡിക്രി ലോ നമ്പർ 33 ന്റെ അടിസ്ഥാനത്തിൽ പൊതു അവധി ദിവസങ്ങളിൽ ജോലി ചെയ്യുന്നതിന് സ്വകാര്യ മേഖലയിലെ ജീവനക്കാർക്ക് എങ്ങനെ നഷ്ടപരിഹാരം നൽകണമെന്നതിനെ കുറിച്ച് ആർട്ടിക്കിൾ 28 വ്യക്തമാക്കുന്നു. അതിൽ ജീവനക്കാരുടെ അവകാശങ്ങളെ കുറിച്ചും നിയമങ്ങളെ കുറിച്ചും വിശദീകരിക്കുന്നു.
നിലവിൽ പൊതു അവധി ദിവസങ്ങളിൽ തൊഴിലാളിക്ക് പൂർണ ശമ്പളത്തോടുകൂടിയ ഔദ്യോഗിക അവധി ദിവസങ്ങൾ നൽകണമെന്നാണ് വ്യക്തമാക്കിയിട്ടുള്ളത്. കൂടാതെ പൊതു അവധി ദിവസങ്ങളിൽ തൊഴിലാളി ജോലി ചെയ്യേണ്ടിവരുമെന്ന് ആവശ്യപെട്ടിട്ടുണ്ടെങ്കിൽ തൊഴിലാളിക്ക് ഓരോ ദിവസത്തിനും മറ്റൊരു ദിവസം കൂടി തൊഴിലുടമ നഷ്ടപരിഹാരം നൽകണം.
അല്ലെങ്കിൽ സാധാരണ പ്രവൃത്തി ദിവസങ്ങളിൽ നിശ്ചയിച്ചിട്ടുള്ള വേതനത്തിനനുസരിച്ച് ആ ദിവസത്തെ വേതനം നൽകണം എന്നാണ് മന്ത്രാലയം വ്യക്തമാക്കിയിട്ടുള്ളത്. കൂടാതെ ആ ദിവസത്തെ അടിസ്ഥാന വേതനത്തിന്റെ 50 ശതമാനത്തിൽ കുറയാത്ത വർധനവ് നൽകണം എന്നതും നിർബന്ധമാണ്.
തൊഴിലാളിക്ക് നഷ്ടപരിഹാരം ബാധകമാകണമെങ്കിലും ചില നിബന്ധനകൾ കൂടെ പാലിക്കേണ്ടതുണ്ട്. യുഎഇ തൊഴിൽ നിയമ നമ്പർ 33/2021 ലെ ആർട്ടിക്കിൾ 28 എല്ലാ തൊഴിലാളിക്കും ബാധകമാണ്. അതിനാൽ തന്നെ വിഭാഗങ്ങളോ ഗ്രേഡുകളോ പരിഗണിക്കാതെ തൊഴിലുടമ തൊഴിലാളിയോട് ജോലി ചെയ്യാൻ അഭ്യർത്ഥിച്ചിട്ടുണ്ടെങ്കിൽ പൊതു അവധി ദിവസങ്ങളിൽ ജോലി ചെയ്യാൻ അനുമതി നൽകേണ്ടതുണ്ടെന്ന് അൽ സുവൈദി ആൻഡ് കമ്പനിയിലെ സീനിയർ അസോസിയേറ്റ് സുനീർ കുമാർ ഗൾഫ് ന്യൂസിനോട് പറഞ്ഞതായി റിപ്പോർട്ട് ചെയ്തു.
കൂടാതെ തൊഴിലുടമ തൊഴിലാളികൾക്ക് ഓരോ ദിവസത്തെ അവധിക്കും പകരമായി മറ്റൊരു ദിവസത്തെ വിശ്രമം നൽകുകയും വേണം അല്ലെങ്കിൽ ജീവനക്കാരന് ആ ദിവസത്തെ വേതനം നൽകണം അതിൽ ആ ദിവസത്തെ അടിസ്ഥാന ശമ്പളത്തിന്റെ 50 ശതമാനത്തിൽ കുറയാത്ത അധിക തുകയും നൽകണം.
യുഎഇയിലെ ഒരു തൊഴിലാളി എന്ന നിലയിൽ തൊഴിൽ നിയമത്തെ അടിസ്ഥാനമാക്കി അവകാശങ്ങളെക്കുറിച്ച് അന്വേഷിക്കാനോ അല്ലെങ്കിൽ നിങ്ങൾക്ക് ലഭിക്കുന്ന നഷ്ടപരിഹാരവുമായി ബന്ധപ്പെട്ട പരാതികൾ ഉന്നയിക്കാനോ ആഗ്രഹിക്കുന്നുവെങ്കിൽ അതിനുള്ള ഏറ്റവും എളുപ്പ മാർഗം മാനവ വിഭവശേഷി സ്വദേശിവൽക്കരണ മന്ത്രാലയവുമായി ബന്ധപ്പെടുക എന്നതാണ്.
കാരണം യുഎഇയിലെ തൊഴിലുടമ ജീവനക്കാരുടെ ബന്ധങ്ങൾ കൈകാര്യം ചെയ്യുന്നതും നിയന്ത്രിക്കുന്നതും മാനവ വിഭവശേഷി സ്വദേശിവൽക്കരണ മന്ത്രാലയം ആണ്. അതിനാൽ ഇരു കക്ഷികളും തമ്മിലുള്ള ഏതൊരു തർക്കവും യുഎഇ തൊഴിൽ നിയമത്തെ അടിസ്ഥാനമാക്കിയാണ് പരിഹരിക്കുന്നത്.
Comments (0)