Uae Remote Work Visa;യുഎഇയിൽ ഇരുന്ന് വിദേശ കമ്പനിക്ക് ജോലി ചെയ്യാം; പക്ഷേ കയ്യിൽ ഈ പറയുന്ന കാശ് വേണം
Uae Remote Work Visa;യുഎഇ: ആഗോളതലത്തിൽ കഴിവുറ്റ പ്രൊഫഷണലുകളെ ആകർഷിക്കുന്നതിനായി അവതരിപ്പിച്ച ഒരു നൂതന വിസ വിഭാഗമാണ് റിമോട്ട് വർക്ക് വിസ. 2021 മാർച്ചിലാണ് ഇത് പ്രാബല്യത്തിൽ വന്നത്. ജോലി ചെയ്യുന്ന കമ്പനി യുഎഇക്ക് പുറത്തായിരിക്കുകയും എന്നാൽ യുഎഇയിൽ താമസിച്ച് ജോലി ചെയ്യാൻ ആഗ്രഹിക്കുന്നവർക്കാണ് ഈ വിസ പ്രയോജനപ്പെടുന്നത്.റിമോട്ട് വര്‍ക്ക് വിസ സംവിധാനവുമായി ബന്ധപ്പെട്ട് പുതിയ മാറ്റങ്ങള്‍ കൊണ്ടു വന്നിരിക്കുകയാണ് യുഎഇ. ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്, കസ്റ്റംസ് ആന്‍ഡ് പോര്‍ട്ട് സെക്യൂരിറ്റിയാണ് ഇതുമായി ബന്ധപ്പെട്ട പുതിയ നിയമം കൊണ്ടു വന്നിരിക്കുന്നത്. ലോകത്തെ ഏത് കമ്പനിയിലും ജോലി ചെയ്യുന്നവര്‍ക്ക് ഈ വിസ ലഭിക്കും. എന്നാല്‍ പ്രതിമാസം കുറഞ്ഞത് 3,500 ഡോളര്‍ (ഏതാണ്ട് 1.3 ലക്ഷം രൂപ) വരുമാനമുണ്ടെന്ന് തെളിയിക്കണമെന്ന് മാത്രം. ഈ വിസ ഉപയോഗിച്ച് ഒരു വർഷം യുഎഇയിൽ ജോലി ചെയ്യാം. നിബന്ധനകൾ പാലിച്ചാൽ ഇത് പുതുക്കാവുന്നതാണ് . വിദേശികൾക്ക് ഒരു പ്രാദേശിക സ്പോൺസറില്ലാതെ തന്നെ യു.എ.ഇയിൽ താമസിക്കാൻ ഈ വിസ അനുവദിക്കുന്നു എന്നതാണ് ഏറ്റവും വലിയ പ്രത്യേകത.
വിസയ്ക്ക് അപേക്ഷിക്കുന്നതിനുള്ള രേഖകൾ എന്തൊക്കെയാണെന്ന് നോക്കാം.
1. യു.എ.ഇക്ക് പുറത്തുള്ള ഒരു കമ്പനിയിലോ സ്ഥാപനത്തിലോ നിന്നുള്ള വിദൂര ജോലി തെളിയിക്കുന്ന രേഖ,
2. കുറഞ്ഞത് 3,500 ഡോളറിന് തുല്യമായ മാസ വരുമാനം തെളിയിക്കുന്ന രേഖ,
3. 6 മാസ കാലാവധിയുള്ള പാസ്പോർട്ട്, കളർ പാസ്പോർട്ട് സൈസ് ഫോട്ടോ, യു.എ.ഇയിൽ സാധുതയുള്ള ആരോഗ്യ ഇൻഷുറൻസ് എന്നിവയാണ് പ്രധാന രേഖകൾ.
കസ്റ്റംസ് ആന്‍ഡ് പോര്‍ട്ട് സെക്യൂരിറ്റി വെബ്സൈറ്റ് വഴിയോ യു.എ.ഇ.ICP മൊബൈൽ ആപ്പ് വഴിയോ അപേക്ഷിക്കാം. അപേക്ഷകർക്ക് വിസ ലഭിച്ചാൽ 60 ദിവസത്തിനുള്ളിൽ യു.എ.ഇയിൽ പ്രവേശിക്കാം.
ഓൺലൈനായി എങ്ങനെ അപേക്ഷിക്കാമെന്ന് നോക്കാം
ICP വെബ്സൈറ്റിലോ ആപ്പിലോ രജിസ്റ്റർ ചെയ്ത് ലോഗിൻ ചെയ്യുക, ആവശ്യമായ വിവരങ്ങൾ പൂരിപ്പിച്ച് രേഖകൾ അപ്‌ലോഡ് ചെയ്യുക, ഫീസ് അടയ്ക്കുക, തുടർന്ന് അപേക്ഷകന് വിസ ഇമെയിൽ വഴി ലഭിക്കും. അപേക്ഷാ ഫീസ് 350 ദിർഹമാണ്. അതിൽ വിസ ഇഷ്യു ചെയ്യാനുള്ള ഫീസ് 100 ദിർഹം, അപേക്ഷാ ഫീസ് 100 ദിർഹം, സ്മാർട്ട് സർവീസസ് ഫീസ് 100 ദിർഹം, ഐ.സി.പി സർവീസ് ഫീസ് 50 ദിർഹം എന്നിവ ഉൾപ്പെടുന്നു.
Comments (0)